Како дел од здравствено-превентивните активности, а во рамки на одбележувањето на Неделата на борба против ракот, од 1 до 8 март под мотото „Превенцијата спасува животи“, активистите на охридската организација на Црвениот крст организираат активности за подигање на јавната свест за превенција и навремено дијагностицирање на малигните заболувања.
Во таа насока, Црвен крст – Охрид денеска од 11 часот организира предавање за малигните заболувања, со посебен акцент на рак на простата, кое ќе се одржи во просториите на организацијата.
Секоја година во светот повеќе од 12 милиони луѓе заболуваат од некој вид на рак, а 7,6 милиони го губат животот како последица на болеста. Во Македонија годишно се откриваат преку шест илјади нови случаи на заболени од рак.
Експертите од Меѓународната унија за рак и Светската здравствена организација нагласуваат дека приближно 40 проценти од карциномите можат да се спречат, а ризикот од развој на болеста може значително да се намали со примена на едноставни превентивни мерки и одржување здрави животни навики.