Силно невреме проследено со обилни снежни врнежи и екстремно ниски температури ја зафати Грција, предизвикувајќи сериозни проблеми во Тракија и северните делови на земјата. Поради безбедносни причини и заледени коловози, локалните власти одлучија училиштата во погодените општини да останат затворени, а наставата да се одвива онлајн.
Според грчкиот јавен сервис ЕРТ, најкритично е во планинските предели каде веќе се бележат заглавени возила. Во близина на Серес, кај ски-центарот Лајлија, околу 15 возила со часови останаа блокирани на патот бидејќи возачите не поседувале задолжителни синџири за снег.
Метеоролозите предупредуваат дека лошото време ќе продолжи и во текот на денот, со засилен ветер и дополнителен пад на температурите, особено на Крит и Источниот Егеј. Властите апелираат до граѓаните и туристите да не патуваат без итна потреба и строго да ја почитуваат обврската за носење зимска опрема.