Францускиот претседател Емануел Макрон се обрати на Светскиот економски форум во Давос со порака дека светот би требало да влезе во период на мир, стабилност и предвидливост, изјава која предизвика смеа кај дел од присутните.
Во продолжение од говорот, Макрон оцени дека реалноста оди во спротивна насока и предупреди дека глобалната сцена влегува во период на „нестабилност и нерамнотежа“, како на безбедносен, така и на економски план, со зголемени ризици од автократија и вооружени конфликти.
„Конфликтот стана нормализиран“, изјави Макрон.
Францускиот претседател се појави на сцената носејќи очила за сонце, кои ги носи јавно и во последните денови поради изразено крварење во десното око.
Закани за царини, автократија и „свет без правила“
Во обраќањето, Макрон предупреди дека постои сериозна опасност од „движење кон свет без правила“, во кој меѓународното право сè почесто се прекршува, а преовладува правото на посилниот. Тој оцени дека станува збор за „многу загрижувачки времиња“, директно алудирајќи на агресивната надворешна политика на администрацијата на американскиот претседател Доналд Трамп.
Осврнувајќи се на трговските односи, Макрон нагласи дека конкуренцијата од Соединетите Американски Држави, преку договори кои, како што рече, „ги поткопуваат нашите извозни интереси, бараат максимални отстапки и отворено имаат за цел да ја ослабнат и потчинат Европа“, во комбинација со „бесконечното акумулирање на нови тарифи“, е „фундаментално неприфатлива“ за Европа.
„Ова е уште посериозно кога тарифите се користат како средство за притисок врз територијалниот суверенитет“, изјави Макрон.
Тој додаде дека Европејците во моментов се „единствените кои не ги штитат своите компании и пазари кога другите земји не почитуваат еднакви услови за игра“, предупредувајќи дека европската конкурентност сè повеќе заостанува зад онаа на САД.
„Мора да се соочиме со недостатокот на раст и хроничното недоволно инвестирање“, рече Макрон, додавајќи дека Европа мора суштински да го промени својот пристап доколку сака да остане релевантна и независна во сè понестабилниот глобален поредок.
Суверенитетот и Гренланд
Макрон истакна дека Франција и Европа остануваат цврсто посветени на националниот суверенитет и независност, оценувајќи дека тоа не е застарен концепт, туку лекција научена од Втората светска војна. Истовремено, тој нагласи дека Европа е посветена и на соработката со сојузниците.
Во тој контекст, Макрон потврди дека одлуката за учество во воени вежби во Гренланд била донесена со цел да ѝ се даде поддршка на Данска како сојузник, без упатување закани.
Трамп, Г7 и заканите за францускиот шампањ
Американскиот претседател Доналд Трамп утрово јавно објави порака што ја добил од Макрон, во која францускиот претседател предложил состанок на земјите од Г7 на маргините на форумот во Давос.
Трамп, исто така, изјави дека ќе воведе царини од 200 проценти на францускиот шампањ и вина, доколку Макрон одбие да се приклучи на неговиот таканаречен „Мировен комитет“.
Извор близок до францускиот претседател оцени дека ваквите закани за воведување царини поради одлуката на Франција да ја одбие поканата се „неприфатливи“.