Десетици илјади Кубанци протестираа пред амбасадата на САД во Хавана, осудувајќи го убиството на 32 кубански офицери во Венецуела и барајќи од Вашингтон да го ослободи венецуелскиот претседател Николас Мадуро, објави Асошиејтед Прес.
Тензиите меѓу Куба и САД се зголемија откако Вашингтон изврши напад врз Каракас на 3 јануари, при што беа убиени 32 кубански офицери кои го обезбедувале венецуелскиот лидер.
– „Целата нација се крева!“, соопшти кубанското Министерство за надворешни работи на социјалната мрежа X. „Ова е категоричен одговор на оние кои се осмелуваат да го загрозат мирот и суверенитетот.“
Американскиот претседател Доналд Трамп неодамна побара Куба да склучи договор со него пред да биде „предоцна“. Тој истакна дека Куба повеќе нема да може да живее од нафтата и парите на Венецуела.
Вашингтон ја спроведува политика на санкции против Куба уште од 1960-тите, а за време на претседателствувањето на Трамп, санкциите беа дополнително заострени, задушувајќи ја економијата на островот.