На многу луѓе им е позната состојбата кога некој не нѐ гледа како приоритет, туку како „резервна опција“ – некој што можат „да го земат од полицата“ кога им треба внимание, блискост или (само)потврда. Често за нив се вели дека се „резерва“… Ваквите врски се збунувачки, бидејќи се чини дека постојат, но без јасна намера и насока, пишува порталот „Супержена“.
Следат неколку совети за знаците коишто можеби укажуваат дека партнерот ја држи „саканата“ личност „на полица“, а всушност, затскриено бара „подобра прилика“ за себе.
1. Се појавува доволно, колку „да не го заборавите“…
Партнерот никогаш не исчезнува целосно, но ретко се појавува. Повремените повици и пораки служат за да остане присутен во Вашите мисли и да не се намали Вашиот интерес. Овој вид непредвидливо внимание честопати создава и посилна емоционална приврзаност од постојаната блискост, објави „Јортанго“ (YourTango).
2. Се случува зближување, а потоа одеднаш исчезнува
Во еден миг, се чини дека сте во врска – често се гледате, сè изгледа ветувачки. А потоа, без објаснување, станува недостапен. По некое време, се враќа со „големи гестови“ што ја враќаат неизвесноста кај другата личност во врската.
3. Сè уште не ја преболел „поранешната“
Ако сè уште го носи емотивниот багаж од претходната врска, постои голема веројатност дека Ве гледа како привремена утеха. Можеби му се допаѓате, но приказната од минатото сè уште има предност. Во такви случаи, другата личност во врската е тука за да ја пополни празнината, а не да се изгради нешто ново.
4. Флертува постојано, но дејствува само кога му одговара
Ја одржува тензијата и привлечноста, но иницијативата секогаш зависи од неговите потреби и распоред. Флертувањето служи за да ја одржи опцијата отворена, без обврска и одговорност кон Вашите желби.
5. Зборува убаво, но нема делување
Ветува состаноци, планови, и тоа – „наскоро“, но ништо конкретно не се случува. На крајот, Вие сте таа што го потсетува и ја почнува темата, што јасно покажува дека неговите зборови се само начин да Ве држи во близина.
6. Очекува ваше внимание, но си дава слобода
Сака таа да се сосредоточи на него, додека тој си дава право да истражува други опции. Ако другата личност го прави истото, првата веројатно, би реагирала како повредена жртва. Овој двоен аршин, вообичаено, ја открива потребата за надмоќ и контрола.
7. Ви дава доволно надеж за да останете
Големите изјави и ветувања без вистинска намера – служат само за купување време. Секој мала зрак надеж Ве држи „емоционално врзани“, иако длабоко во себе чувствувате како да стоите во место.
Ако се препознаваат неколку од овие знаци, важното прашање е: Дали сакам да бидам нечиј избор? Бидејќи, секој заслужува врска каде што е приоритет, а не план „за еден ден“.