Градоначалникот на Општина Центар, Горан Герасимовски, најави воведување на „центарска картичка“ – нова услуга наменета исклучиво за жителите на оваа општина. Картичката, која ќе биде електронска и со уникатен бар-код, има за цел да го подобри животниот стандард и да го стимулира локалниот бизнис.
Преку овој проект, граѓаните ќе можат да користат попусти во театри, музеи, аптеки, фитнес центри и угостителски објекти кои работат на територијата на општината. Постапката за аплицирање започнува во јануари, а картичките ќе станат функционални од март.
Покрај картичката, Герасимовски најави и зголемување на социјалните надоместоци. Помошта за пензионерите со ниски примања се удвојува, а се зголемуваат и средствата за новороденчиња, како и стипендиите за учениците.
„Воведуваме центарска картичка како дополнителна услуга за жителите на Општина Центар, но и како директна поддршка и промоција на локалниот бизнис-сектор. Со оваа картичка граѓаните ќе добиваат попусти и поволности на одредени производи и услуги”, истакна Герасимовски.