Голем скандал ја потресе јавноста откако познатата бугарска новинарка Соња Колтуклиева беше брутално турната од обезбедувањето на претседателката на Парламентот, Михаела Доцова, додека се обидуваше да ѝ постави новинарско прашање. Инцидентот предизвика бурна реакција и остри осуди од политичките партии во земјата.
Тешкиот инцидент се случи пред седиштето на партијата „Прогресивна Бугарија“, кратко откако премиерот Румен Радев одржа итен брифинг во врска со критичката изјава на Европскиот парламент за неговата политика кон Москва. Додека Колтуклиева се обидуваше да постави прашање во врска со сослушувањата поврзани со помилувањето на трговец со дрога, припадник на Службата за национална безбедност (НСО) енергично ја оттурнал, по што таа паднала на тротоарот и останала неподвижна.
Според очевидци и снимките кои се проширија на интернет, присутните претставници на власта и обезбедувањето поминале покрај неа со целосна рамнодушност, без да ѝ пружат помош. Новинарката подоцна била хоспитализирана во Воено-медицинската академија, каде што ѝ биле констатирани исчашено рамо и сомнежи за потрес на мозокот, по што била пуштена на домашно лекување.
Инцидентот предизвика лавина од реакции. Опозициските партии, предводени од ГЕРБ-СДФ, побараа итна оставка од претседателката на Собранието, Михаела Доцова, оценувајќи дека неприфатливо е новинар да биде соборен на земја поради вршење на својата професионална работа. Остри критики упатија и други политички лидери, барајќи одговорност од раководството на Службата за национална безбедност и институциите.