Советот на ЕУ донесе одлука за проширување на рестриктивните мерки, таргетирајќи пет поединци и четири компании кои се одговорни за поддршка на руската „флота во сенка“ – бродови што илегално транспортираат руска нафта и нафтени деривати.
Петте санкционирани поединци се бизнисмени кои се индиректно или директно поврзани со руските нафтени гиганти „Росњефт“ и „Лукоил“.
ЕУ смета дека тие контролираат танкери кои го прикриваат вистинското потекло на руската нафта, кршејќи ги рестриктивните мерки и овозможувајќи ѝ на руската Влада дополнителни приходи за финансирање на војната во Украина.
Четирите правни субјекти кои се додадени на листата имаат седишта во Обединетите Арапски Емирати, Виетнам и Русија. Тие поседуваат или стопанисуваат со танкерите кои се дел од „флотата во сенка“.
Со ова проширување, сите средства на санкционираните лица и компании во ЕУ се замрзнати. За физичките лица е воведена и забрана за патување, влез или транзит низ територијата на Унијата.
На листата на санкционирани лица поради поврзаност со „флотата во сенка“ моментално се наоѓаат над 2600 физички и правни лица.