Родителите се главната причина за масовната појава на инсистирање на високи оценки без соодветно знаење, што прави огромна штета на децата и на општеството, оцени денеска министерката за образование и наука, Весна Јаневска.
За време на посетата на Струмица, таа истакна дека проблемот со „петките“ е сериозен и дека Министерството преку кампањата „Магијата е знаењето“ се обидува да влијае на свеста на родителите.
„Проблемот со ’петките‘ во земјата е навистина сериозен и од моето долгогодишно, веќе пет-шест години со контактите со наставниците, тој генерално се лоцира кај родителите. Токму и ова кампања е во тој правец за да им кажеме на оние родители кои инсистираат нивните деца да добиваат високи оценки без соодветно знаење дека де факто им прават голема штета прво на своите деца, а потоа и на целото општество“, изјави Јаневска.
Според неа, послабата оценка не треба да се доживува како казна, туку како мотив за учениците да постигнат одредени вештини. Јаневска посочи дека веќе се преземени мерки, како воведувањето на Е-дневникот, за да се намалат влијанијата и стереотипите.
Во однос на високото образование, министерката смета дека не е праведно да има „две скалила на елиминација“, односно и државна матура и приемен испит, иако факултетите имаат право да организираат проверки, како што тоа го прави Архитектонскиот факултет.
Таа најави и промени во државната матура, каде се одвојува стручната од гимназиската матура, прилагодена на наставните планови, но со иста проодност кон факултетите.