Навидум безопасна порака што циркулира на WhatsApp овие денови всушност може да биде опасна измама.
Според медиумските извештаи, сè повеќе корисници добиваат пораки со текст како: „Дали сте тоа вие?“ или „Дали ја препознавате оваа фотографија?“ со прикачена слика.
Иако ваквите пораки предизвикуваат љубопитност, токму на тоа сметаат измамниците. Зад нив често стојат заразени датотеки што можат да им дадат пристап на хакерите до вашиот телефон, пораки, лозинки и други чувствителни податоци.
Особено загрижувачко е што во некои случаи, малициозен код може да се лансира дури и без кликнување на сликата – доволно е автоматски да се појави преглед.
Според порталот Futurezone, криминалците ги искористуваат недостатоците во начинот на кој WhatsApp ги обработува сликите и видеата. Со манипулирање со процесот на таканаречено „парсирање“ на медиуми, малициозниот софтвер може да работи во позадина и да обезбеди целосен пристап до уредот.
Последиците може да вклучуваат кражба на идентитет, пристап до лозинки, па дури и целосна контрола врз вашиот уред. WhatsApp нагласува дека ова не е единствената закана. Пораките што доаѓаат од „пријатели“ или „членови на семејството“ кои бараат пари, нудат „лесни пари од дома“ или рекламираат сомнителни крипто или инвестициски можности, исто така, стануваат сè почести.
Сите тие делат заеднички модел – правописни грешки, линкови и барања за лични информации. Најдобрата одбрана е да ги исклучите автоматските преземања на медиуми во поставките на WhatsApp:
Можете да го направите ова со одење во Поставки > Складирање и податоци > Автоматски преземања на медиуми
Дополнително, редовно ажурирајте ја апликацијата и системот за да ги отстраните безбедносните ранливости. Ако веќе сте отвориле сомнителна порака или слика, веднаш блокирајте го бројот, пријавете го контактот, проверете за необична активност на вашиот телефон и променете ги лозинките. Ако се сомневате на кражба на податоци, контактирајте ја полицијата.