Мултимедијалниот проект „ЗОО приказни“, наменет за најмладите посетители, денеска ќе се одржи во едукативниот центар на Зоолошката градина во Скопје.
Проектот го организира ЈУ Детски културен центар – Карпош во соработка со Зоолошката градина – Скопје. Годинава ќе бидат претставени пет нови едукативни приказни посветени на фламингата, шимпанзата, антилопите, зебрите и лавовите.
Преку приказни и мултимедијални содржини, децата ќе имаат можност да дознаат повеќе за животните, нивните живеалишта и начинот на исхрана, но и за правилното однесување при посетата на Зоолошката градина.
Овогодишниот циклус ги обработува вредностите на скромноста, искреноста, одговорноста, сигурноста и припадноста, кои се претставени преку приказните за петте животински видови.