Украинскиот претседател Володимир Зеленски денеска во Анкара изрази надеж дека размената на затвореници со Русија би можела да биде обновена до крајот на годината.
„Се надеваме дека ќе ја воспоставиме размената до крајот на годината, со цел да се вратат значителен број затвореници. Турција многу ни помага во овој процес“, изјави Зеленски за новинарите по средбата со турскиот претседател Реџеп Таип Ердоган.
Зеленски денеска престојуваше во Турција со цел да ги оживее мировните преговори со Москва.
Претседателот Ердоган повика на продолжување на преговорите во Истанбул меѓу Русија и Украина, со цел да се стави крај на војната со „разорни“ последици.
Руските и украинските делегации веќе се состанаа три пати оваа година – во мај, јуни и јули – на бреговите на Босфорот.
„Во време кога разорните ефекти од војната се влошуваат за двете страни, веруваме дека разговорите во Истанбул се важен чекор кон дипломатско решение“, рече турскиот претседател, кој го угости својот украински колега Зеленски во Анкара.
„Остануваме подготвени да разговараме за предлозите со Русија за активирање на прекинот на огнот и отворање на патот кон траен мир“, додаде Ердоган.