Украинскиот претседател Володимир Зеленски, на состанокот со секретарот на американската армија Даниел Дрискол, ја изразил подготвеноста да соработува со администрацијата на Доналд Трамп на нов мировен план. Според изворите, страните се договориле документот да се изготви „во краток временски рок“.
Од Кабинетот на украинскиот претседател соопштија дека Зеленски ги нагласил „фундаменталните принципи што се важни за народот на Украина“, и дека договориле заедничка работа на план кој треба „да доведе до достоинствен крај на војната“. Во соопштението се додава:
„Од почетокот на оваа година, Украина ги поддржува предлозите на претседателот Доналд Трамп за прекин на крвопролевањето. Подготвени сме да продолжиме конструктивно да соработуваме… за да обезбедиме мир.“
Според извори, Зеленски овојпат зазел „попопустлив став“, откако претходната средба со пратеникот на Трамп, Стив Виткоф, пропадна. Американски официјал лица тврдат дека е постигнат договор за „агресивна временска рамка“ за финализирање на планот.
Неофицијалниот документ, изготвен од американскиот и рускиот пратеник, предвидува низа контроверзни точки: префрлање на Донбас под руска контрола, забрана за распоредување странски мировници во Украина, амнестија за воени злосторства, укинување на санкциите против Русија, ограничување на украинската армија и откажување од одредени видови западно оружје. Украина би требало да ги отстрани и упатувањата за членство во НАТО од Уставот.
Извори од европските престолнини велат дека планот предизвикал „шок“, додека аналитичари предупредуваат дека политичката слабост на Киев може да биде искористена за наметнување неповолни услови. Други, пак, сметаат дека Зеленски нема политички простор да прифати отстапки што би личеле на капитулација.