Повеќе од 160 лекари, акушери, медицински лица и други здравствени работници од цела Македонија ќе поминат обуки за борба против корупцијата во јавниот здравствен систем.
Целта на обуките е да се унапредат знаењата и вештините на здравствените работници за препознавање, спречување и пријавување корупциски случаи, со што би се придонело кон создавање поправеден и поодговорен здравствен систем, информираа од Здружението за еманципација, солидарност и еднаквост на жените – ЕСЕ.
Активноста е дел од проектот „Посилен систем за поправедна заштита: Намалување на корупцијата во здравството“, кој го спроведува Здружението ЕСЕ.
Од здружението посочуваат дека борбата против корупцијата треба да започне токму во здравствените установи, каде здравствените работници имаат важна улога во препознавањето и спречувањето на коруптивните практики.
Во рамки на проектот, минатата недела се одржала обука за обучувачи, на која учествувале здравствени работници кои понатаму ќе ги спроведуваат обуките во различни региони низ државата.
На обуките се обработувале теми како етичко постапување, медицинската етика и корупцијата во здравството, родовите аспекти на корупцијата, механизмите за пријавување, заштита на пријавувачите и институционалната одговорност.
Професорката Гордана Панова истакна дека корупцијата во здравството често се појавува преку барање или давање услуги и средства за добивање побрза или поквалитетна здравствена услуга, поради што здравствените работници треба да имаат клучна улога во нејзиното спречување.
Експертката за борба против корупција Лилјана Цветаноска нагласи дека е важно да се препознаваат различните форми на корупција, бидејќи за секоја од нив се потребни различни мерки за превенција и намалување.
Здравствените работници ја оцениле обуката како корисна за нивната секојдневна работа, особено во делот на препознавање корупциски ризици, еднаков третман на пациентите и механизмите за пријавување.
Проектот се реализира со поддршка на Expertise France преку Agence française de développement и опфаќа три главни активности: обука на здравствени работници, подигнување на свеста кај граѓаните и подобрување на политиките и процесите во здравствениот систем.