Завршија средбите на премиерот Христијан Мицкоски со коалициските партнери во Владата пред најавената реконструкција. Како што брифираат од Илинденска бр.2, средбите поминале во конструктивна атмосфера, во духот на меѓусебна почит, партнерство и заедничка определба за понатамошно унапредување на работата на Владата.
Во разговорите потврдени биле принципите кои претседателот на Владата ги истакна на роденденот на партијата ВМРО-ДПМНЕ во Струмица, а кои се однесуваат на одговорност, резултати, достапност до граѓаните, ефикасност во работењето и бескомпромисна посветеност на интересите на народот.
Сите коалициски партнери се договориле Владата да продолжи со засилено темпо во реализацијата на програмските приоритети и реформите кои се очекуваат од граѓаните.
Реконструкцијата, како што брифираат од Влада, не се води од партиски или персонални интереси, туку од потребата за дополнително јакнење на институционалниот капацитет и уште поефикасна реализација на владината програма.
Во наредните неколку денови ќе следуваат финалните консултации и разговори на кои ќе бидат разгледани и потврдени конечните решенија и позиции. Откако и тој процес ќе заврши, јавноста, според Владата, ќе биде навремено и транспарантно информирана за сите донесени одлуки.