Жителите на градот Кастелжинест во Франција веќе два дена се под силен безбедносен притисок откако во населбата била забележана и фотографирана егзотична отровна кобра со очила.
Откако змијата, чие каснување е фатално, била видена во вторникот, властите веднаш прогласија состојба на зголемена готовност. Како што пренесува порталот „BFM“, од влекачот сè уште нема ниту трага.
Поради потенцијалната опасност, градската администрација донесе одлука привремено да ги затвори локалните училишта, парковите, спортските терени, рекреативниот центар и гробиштата.
„Секако дека не можеме да ризикуваме. Го информиравме населението преку електронски табли, социјални мрежи и СМС пораки“, изјави градоначалникот Грегор Карнеиро.
Префектурата издаде итен апел до граѓаните да избегнуваат движење низ висока трева. Доколку ја забележат змијата, тие треба веднаш да ги известат противпожарните служби, без да се обидуваат самите да ја фатат.
Специјализирани екипи во моментов се на терен и вршат пребарување, додека поголем дел од жителите остануваат во своите домови. Властите потсетија дека ова не е прв ваков случај во градот, бидејќи во 2019 година во блиската река бил пронајден кајман.