Грција воведе нови, значително построги ограничувања на брзината во населените места со цел зголемување на безбедноста на пешаците и велосипедистите. Од почетокот на годинава, максималната дозволена брзина на градските улици со по една лента во секој правец е намалена од 50 на 30 километри на час.
Исклучок од ова правило се само големите булевари и еднонасочните улици со најмалку две ленти, каде што протокот на сообраќај дозволува брзина до 50 км/ч. Истражувањата покажуваат дека со ова намалување, ризикот од смрт кај пешаците при евентуален удар се намалува од 80 на само 10 проценти.
Новиот Закон за безбедност на патиштата предвидува и строги санкции за возачите. Оние кои ќе возат со 50 км/ч во зона каде е дозволено 30 км/ч, ќе се соочат со казна од 150 евра и одземање на дозволата на 20 дена.
Доколку брзината е за 30 до 50 км/ч поголема од дозволената, казната изнесува 350 евра со забрана за возење од еден месец. За најтешките прекршоци, односно возење над 80 км/ч во зона со лимит од 30, предвидена е глоба од 700 евра и одземање на возачката дозвола на два месеци.
На македонските туристи им се препорачува особено внимание при влегување во станбени области во Грција за да ги избегнат овие ригорозни санкции.