Директорот на Државен пазарен инспекторат (ДПИ), Влатко Стојкоски денеска информираше дека инспекторите на Државниот пазарен инспекторат спровеле засилени контроли кај 23 правни субјекти кои тргуваат со тутун и тутунски производи на територијата на Скопје, Тетово, Гостивар, Кичево и Струга.
„Кај 16 субјекти беа откриени производи без документи за потекло и без акцизни марки, спротивно на законските прописи. Затекнатите над 3000 пакувања, со вредност од над 1 милион денари, се привремено одземени и предадени на Агенцијата за управување со одземен имот. За прекршоците се издадени платни налози, а случаите се проследени и до Царинската управа и МВР за понатамошно постапување“, истакна Стојкоски.
Тој посочи дека ДПИ ќе продолжи со засилени контроли и решително ќе ја спречува нелегалната трговија, штитејќи ги пазарот и потрошувачите.
„Остануваме посветени на борбата против криминалот и корупцијата и на обезбедување фер и безбеден пазар за сите“, порача Стојкоски.