Портпаролката на руското Министерство за надворешни работи, Марија Захарова, изјави дека неодамна објавената статија на британскиот весник Фајненшл тајмс за можната средба меѓу рускиот министер за надворешни работи Сергеј Лавров и американскиот државен секретар Марко Рубио, имала цел да го наруши процесот на преговори меѓу двете земји.
– Оваа статија во „Фајненшл тајмс“ беше напишана со совршена прецизност. Беше прилагодена на задачата што ја поставија. А кои се тие? Британците, се разбира… И не британските новинари како такви, туку оние што стојат зад и над нив. Затоа што, според нив, мора да се направи сè за да се наруши процесот на преговори, изјави Захарова за радио „Спутник“.
Таа потсети дека, според руската страна, Велика Британија и претходно влијаела на текот на мировните преговори.
– Британците ги нарушија и преговорите во 2022 година. Тогаш сè беше договорено и требаше само да се финализира. Но, по посетата на Борис Џонсон на Киев, преговорите беа прекинати, рече Захарова, додавајќи дека „Зеленски дал наредба да се повлече од процесот“.
Според неа, најновата медиумска објава има за цел да создаде конфузија и да го забави секој можен напредок во разговорите.
– Сега мораа да направат сè за да го расипат, да го спречат, да направат нешто – што било, сè – само за да ги спречат преговорите и постигнувањето на некаков преговарачки моментум, истакна портпаролката.
Весникот Фајненшл тајмс претходно објави дека средбата меѓу Лавров и Рубио би можела да се одржи на 30 октомври во Будимпешта.
Захарова нагласи дека Министерството за надворешни работи на Русија ќе ја информира јавноста кога ќе има конкретни детали за можниот состанок и апелираше медиумите „да не учествуваат во медиумскиот циркус“.