Македонија денеска ја очекува сончев ден со мала локална облачност, по постуденото утро кое го одбележа почетокот на денот. Според најавите, ќе дува слаб до умерен ветер од северен правец.
Минималните температури во земјава се движат во интервал од -3 до 6, додека максималните ќе достигнат од 18 до 25 степени.
Во Скопје времето ќе биде сончево со мала облачност. Слично како и во остатокот од земјата, ќе дува слаб до умерен северен ветер. Утринската температура во главниот град се спушти до 0, а во текот на денот ќе се искачи до 24 степени.
Управата за хидрометеоролошки работи најавува промена во текот на работната недела.
„Според прогнозата на УХМР од вторник ќе преовладува променливо облачно време со сончеви периоди. Ќе дува умерен ветер од јужен правец, а кон крајот на седмицата се очекуваат повремени локални врнежи од дожд“, информираат од Управата.
Граѓаните треба да се подготват за променливи услови во наредните денови, со оглед на најавените локални врнежи пред крајот на седмицата.