Денеска во Македонија ќе преовладува сончево време со мала до умерена облачност. Во попладневните часови се очекуваат повремен локален дожд, со услови за изолирана појава на ретки грмежи. Ќе дува слаб до умерен ветер претежно од јужен правец.
Температурите ќе се движат во интервал од 2 до 8 степени во утринските часови, додека максималните дневни ќе достигнат од 20 до 25 степени. Во Скопје времето ќе биде слично, сончево со мала до умерена облачност, слаб променлив ветер и дневна температура до 25 степени.
Сепак, од средината на неделата се очекува промена на временските услови. Како што соопштуваат од Управата за хидрометеоролошки работи (УХМР), до крајот на седмицата ќе биде променливо облачно со локални врнежи.
Во среда ќе има нестабилна облачност со пороен дожд и грмежи. В четврток се очекува продор на постуден воздух од север, што ќе предизвика пообилни врнежи од дожд, а на планините ќе има услови дождот да премине во снег. Ќе дува умерен до засилен северен ветер, проследен со значителен пад на температурите. Во петок и за време на викендот ќе биде посвежо, со утрински температури кои на места ќе се спуштат и под нулата.