Облаците кои ја зафатија Србија во текот на ноќта во следните часови ќе се преместуваат кон јужните и источните делови на земјата. Така, дожд во наредниот период ќе има во регионите јужно од Сава и Дунав, а попладне и навечер се очекува разведрување низ цела Србија, изјави метеорологот на „Еуроњуз Србија“, Љубица Гојковиќ.
„Продорот на студен воздух од северот на Европа денеска носи и благ пад на температурите. Во повеќето места живата во термометарот нема да надмине 25 степени, а најсвежо ќе биде на крајниот југ од земјата, каде се очекуваат околу 20 степени“, наведува Гојковиќ.
За време на викендот ќе има краткотрајна стабилизација на времето. Во сабота и недела времето ќе биде мирно, без врнежи, со пораст на температурите. Максималната дневна температура во сабота ќе достигне до 28 степени, а во недела локално и над 30 степени.
УХМР најави невреме и во Македонија. Времето денеска ќе биде променливо облачно и посвежо, со повремени врнежи од дожд, кои локално ќе бидат поинтензивни и ќе надминат 15 литри на квадратен метар, соопшти Управата за хидрометеоролошки работи.
На места се очекува нестабилност со пороен дожд, грмежи и засилен ветер. Ќе дува слаб до умерен северен ветер, а долж Повардарието повремено ќе достигнува брзина над 50 километри на час.
Дневната температура ќе се движи во интервал од 20 до 27 степени Целзиусови.
Во Скопје ќе преовладува променливо облачно и посвежо време, со повремени врнежи од дожд, кои на одредени места може да бидат пообилни. Во делови од котлината се можни поројни врнежи, грмежи и засилен ветер. Ќе дува слаб до умерен северен ветер, а максималната температура ќе достигне 26 степени.