Министерството за здравство го задолжи Центарот за јавно здравје – Скопје вечерва да спроведе дополнителна терестичка (од земја) адултицидна дезинсекција во населбата Драчево.
Како што информираат од ресорното министерство, оваа активност претставува превентивна мерка која се реализира врз основа на стручната информација и проценката на ризик изготвени од ЦЈЗ – Скопје, но и поради актуелната епидемиолошка состојба со лабораториски потврдени случаи на западнонилска треска во земјава.
Станува збор за вонредно прскање против комарци кое се спроведува по индикација, согласно Програмата за јавно здравје.
Паралелно со оваа извонредна мерка, согласно годишниот план на Центарот за јавно здравје – Скопје, континуирано се реализираат и редовните активности за дезинсекција на целата територија на Град Скопје.
Од ЦЈЗ – Скопје информираат дека во текот на мај и јуни се спроведени три акции на ларвицидна авионска дезинсекција.
Во текот на јули е реализирана и втората акција на терестичка адултицидна дезинсекција насочена кон сузбивање на возрасните форми на комарци во повеќе скопски населби, меѓу кои: Ѓорче Петров, Хром, Влае, Карпош, Дебар маало, Маџир маало, кеј на Вардар, Водно, Пржино, Драчево, Маџари и Лисиче.