Секторот Инспекторат на Општина Карпош, во соработка со полициски службеници од Полициската станица Карпош, спроведе вонредни инспекциски надзори во урбаната заедница Злокуќани.
Главниот фокус на контролите беа дивоградбите во овој дел од општината.
За време на теренскиот увид, општинскиот градежен инспектор утврди неправилности кај повеќе бесправно изградени објекти. За констатираните прекршоци веќе е започната соодветна инспекциска постапка согласно законските надлежности.
Паралелно со градежните контроли, општинскиот комунален инспектор работеше на терен во координација со службите за одржување на јавната хигиена. Со употреба на соодветна механизација беше отстранет кабаст отпад од јавните површини по должината на улицата „Скупи“, како и во внатрешноста на населбата.
Во рамки на акцијата беа опоменати повеќе физички лица и домаќинства поради неправилно одлагање отпад и нарушување на јавната чистота.
Инспекциските служби искористија можност и да остварат директен разговор со жителите на Злокуќани за комуналните проблеми и предизвици со кои се соочуваат.
Од Општина Карпош информираат дека редовните инспекциски контроли продолжуваат секојдневно.
Заедничките акции на Инспекторатот и полицијата ќе бидат дополнително засилени во наредниот период, со цел воспоставување поголема контрола и одржување на јавниот ред, чистотата и законитоста во Злокуќани.