Сите анализирани примероци земени од водоснабдителниот систем во Скопје се целосно исправни и одговараат на Правилникот за барања за безбедност и квалитет на водата за пиење.
Ова го соопштија попладнево од Јавното претпријатие „Водовод и канализација“ – Скопје, информирајќи за реализираните дневни мониторинг-активности.
Во рамки на денешните проверки, секторот Санитарна контрола при јавното претпријатие зеде вкупно 42 примерока од различни точки на водоводната мрежа низ градот.
Од нив, четири примероци биле земени конкретно од бунарскиот потег Нерези – Лепенец.
Од јавното претпријатие потсетија дека на сите примероци им се изработува физичко-хемиска и микробиолошка анализа согласно Правилникот за барања за безбедност и квалитет на водата за пиење, во акредитираните лаборатории при секторот Санитарна контрола.