Во водата за пиење од градскиот водовод во Валандово е утврдено зголемено ниво на арсен, соопшти денеска ЈП „Комунален сервис“ од Валандово.
Присуството на арсен е потврдено во лабораториските резултати од анализите што ги изврши Институтот за јавно здравје – Скопје.
Поради новонастанатата ситуација, од јавното претпријатие упатија итно известување и упатства до жителите на градот.
Во соопштението објавено од ЈП „Комунален сервис“ – Валандово се наведува:
„Поради наведеното, се препорачува водата од градскиот водовод во Валандово да не се користи за пиење сѐ до добивање на нови резултати кои ќе ја потврдат нејзина исправност. Водата може да се користи исклучиво како техничка вода. ЈП „Комунален сервис“ – Валандово веќе ги презема сите потребни активности и врши дополнителни анализи и контроли на квалитетот на водата, во соработка со надлежните институции. За сите понатамошни резултати и препораки, јавноста ќе биде навремено известена.“
Од комуналното претпријатие апелираат до сите граѓани строго да се придржуваат до дадените препораки сè додека не пристигнат нови официјални анализи кои ќе потврдат дека водата е безбедна за употреба.