Православните верници на 30 јули го одбележуваат празникот на светата великомаченичка Марина, во народот позната како Огнена Марија. Таа во христијанската традиција се почитува како борец за верата и заштитничка на жените.
Според народните верувања, Света Марина спаѓа во редот на таканаречените огнени светци, кои палат и казнуваат со оган. Исто како и Свети Илија, кој според преданието казнува со гром, и за овој празник се врзани строги обичаи.
Во македонската традиција постои обичај на овој ден, кога поради големите летошни жештини „гори и небото и земјата“, да не се извршува никаква тешка физичка работа. Во народните преданија се споменуваат бројни примери за оган и громови кои ги палеле житото, сеното и домовите на луѓето кои не го почитувале празникот и работеле на нива или околу куќата.
Житието вели дека Света Марина била родена во Антиохија Писидиска во незнабожечко семејство. На дванаесетгодишна возраст за првпат слушнала за Господ Исус Христос, Неговото воплотување, чуда, крсна смрт и воскресение, по што се заветувала дека никогаш нема да се мажи и дека сака да пострада за верските убедувања. Поради ова, нејзиниот татко се одрекол од неа.
Подоцна, царскиот намесник Олимвриј дознал за неа и побарал да му стане жена. Откако таа го одбила и одбила да им се поклони на идолите, била подложена на тешки мачења и фрлена во затвор. Според преданието, во затворот ѝ се јавил ѓаволот во облик на страшна змија, која се распукала откако светителката се прекрстила.
Откако ги преживеала мачењата со оган и вода, Олимвриј на крајот ја осудил на смрт со меч.