Владејачката партија ВМРО-ДПМНЕ преку официјално соопштение упати остри критики до Јавното обвинителство за гонење на организиран криминал и корупција (ОЈО ГОКК), лоцирајќи ја одговорноста кај шефот Ислам Абази и обвинителката Катерина Коларевиќ. Според партијата, овој „обвинителски тандем“ свесно донел скандалозна одлука за стопирање на истрагата за набавка на мазут за ТЕЦ Неготино, со цел да се заштитат луѓе блиски до опозицијата.
Во партиската реакција детално се анализира начинот на кој била водена истрагата за тендерот вреден милиони евра.
„Овој коалициски тандем, кој не е во собраниски клупи туку во обвинителството, пред неколку дена донесе скандалозна одлука да се стопира постапката за случајот тежок 176 милиони евра за набавка на мазут за потребите на ТЕЦ Неготино иако постојат сериозни сомнежи и индиции за голем криминал и корупција, перење пари и загадување на животната средина… Од демантот на ЕСМ јасно може да се види дека обвинителите Абази и Коларевиќ повеќе се занимавале со земање на изјави од некомпетентни лица, наместо сериозно да истражуваат и да обезбедат докази за оваа сомнителна набавка на мазут, вредна неверојатни 167 милиони евра.“
Од ВМРО-ДПМНЕ посочуваат дека обвинителите намерно ги занемариле официјалните наоди на Државниот завод за ревизија од 2024 година, како и внатрешните извештаи на стручните лица од ЕСМ кои нотирале дефекти во термоцентралата поради лошиот квалитет на енергенсот.
„Доказите постоеле, извештаите со констатирани сериозни забелешки и пропусти постоеле, само Абази и Коларевиќ не ги виделе. Којзнае, може намерно замижале за да не ги видат и одговорност да ги спасат Васко Ковачевски, Јахоски, Сулкоски, Капушевски, Адријан Муча и нивните партнери, сите до еден блиски на СДС и ДУИ. Затоа сметаме дека Абази и Коларевиќ не се достојни на функцијата да бидат во Јавното обвинителство за гонење на криминал и корупција, затоа што и двајцата имаат свои лични, семејни или политички долгови за нивниот кариерен напредок, а истите се поврзани со политичките партии ДУИ и СДС.“
На крајот, од владејачката партија побараа итна институционална разрешница и ревизија на постапувањето на двајцата обвинители од страна на повисоките инстанци.
„Уште еднаш го повикуваме Советот на јавни обвинители да се позанимава со овој случај, да го истражи работењето и постапувањето на Абази и на Коларевиќ во случајот „Мазут“ за да утврди кои намерни или, можеби, ненамерни пропусти се направени, со цел случајот да се затвори пред да стигне на суд. Целата вистина за овој случај од висок јавен интерес… мора да излезе на виделина.“