ВМРО-ДПМНЕ оценува дека на предвремените локални избори во Брвеница настапило со развојна програма и проекти, но дека изборната кампања била обележана со етнички поделби наместо со натпревар на идеи и решенија за граѓаните.
Од партијата велат дека концептот „Една Брвеница за сите“ бил насочен кон единство, соживот, меѓусебна почит и инфраструктурен развој, додека нивните политички противници, според нив, ја насочиле кампањата кон етничко гласање.
ВМРО-ДПМНЕ наведува дека на вториот изборен круг освоило околу 4.200 гласа, наспроти 3.000 во првиот круг, што претставува раст од 1.300 гласови во споредба со парламентарните избори. Сепак, тоа не било доволно нивниот кандидат Јованчо Радичевски да ја освои градоначалничката функција.
Од партијата тврдат дека СДСМ и Левица, кои во првиот круг завршиле на четвртото и петтото место, во вториот круг се ставиле во функција на ДУИ со цел да му наштетат на ВМРО-ДПМНЕ.
Критики упатуваат и кон коалицискиот партнер ВРЕДИ, за кого сметаат дека пропуштил можност да се дистанцира од политиките на етнички национализам и да понуди поинаков пристап во Брвеница.
Од ВМРО-ДПМНЕ порачуваат дека изборната кампања е завршена, но дека граѓаните, без разлика на етничката припадност, очекуваат реализација на проекти и подобри услови за живот.
Партијата најавува дека Владата предводена од ВМРО-ДПМНЕ ќе продолжи со инвестиции и инфраструктурни проекти во општина Брвеница, со цел нејзин развој и подобрување на животниот стандард на жителите.