ВМРО-ДПМНЕ бара од Стево Пендаровски јавно да објасни каква е неговата поврзаност со објектот во скопската населба Влае, за кој самиот признал дека е во сопственост на неговиот близок соработник Еролд Муслиу. Од партијата отвораат прашања за потеклото на парите вложени во изградбата, имотната состојба на Муслиу и можен судир на интереси.
Од ВМРО-ДПМНЕ прашуваат дали пријавените приходи и имотната состојба на Муслиу одговараат на вредноста на инвестицијата, дали се пријавени сите негови деловни интереси и дали постојат недозволени поврзаности од периодот кога извршувал јавна функција.
Од партијата бараат и самиот Муслиу да го објасни потеклото на средствата со кои се финансира изградбата, а надлежните институции да ја проверат документацијата, финансирањето и законитоста на инвестицијата.
ВМРО-ДПМНЕ смета дека Јавното обвинителство и Државната комисија за спречување на корупцијата треба да го испитаат случајот и да утврдат дали постои судир на интереси или поврзаност со претходното службено работење на Муслиу.
„Граѓаните имаат право да знаат дали луѓето кои извршувале високи јавни функции можат да го оправдаат своето богатство со законски стекнати приходи. Нема недопирливи. Нема привилегирани. Законите мора да важат подеднакво за сите“, наведуваат од ВМРО-ДПМНЕ.