Владата денеска ги демантираше тврдењата на СДСМ дека договорот со компанијата „Кожувчанка“ за набавка на вода за пиење за граѓаните на Гостивар бил склучен со директно договарање, без јавен оглас.
Од Владата велат дека станува збор за, како што наведуваат, „манипулации и дезинформации“, посочувајќи дека постапката со преговарање ја спровела Службата за општи и заеднички работи, а договорот преку тендер го добила компанијата „Кожувчанка“.
„Во отсуство на реални теми и аргументи, СДС повторно се служи со лаги и искривување на фактите, надевајќи се дека ќе ја доведе јавноста во заблуда“, наведуваат од Владата.
Од Владата повторуваат дека ќе продолжат да обезбедуваат безбедна вода за пиење за жителите на Гостивар сè додека надлежните институции официјално не потврдат дека водата од водоводниот систем е исправна за употреба.
Во однос на набавката на флаширана вода, Владата појаснува дека постапката ја спровела Службата за општи и заеднички работи, а водата им се обезбедува бесплатно на граѓаните. Од таму додаваат дека шише вода од 1,5 литри, кое во малопродажба чини најмалку 25 денари, е набавено по цена од 12,5 денари.
Според Владата, пониската цена е резултат на тоа што компанијата „Кожувчанка“ учествувала со сопствен придонес со цел да се помогне на граѓаните и институциите во услови на кризна состојба.
Претходно, СДСМ обвини дека Владата преку Службата за општи и заеднички работи склучила договор за набавка на вода во вредност од 100.000 евра без јавен оглас. Опозициската партија побара одговорност и посочи дека договорот бил склучен со „Кожувчанка“.