Во судницата во Идризово денеска продолжува судскиот процес за пожарот во дискотеката „Пулс“ во Кочани, трагедија во која животот го загубија 63 лица, а повеќе од 200 беа повредени.
Пред Основниот кривичен суд Скопје продолжува доказната постапка, а на денешното рочиште одбраната треба да продолжи со вкрстено испрашување на тимот градежни вештаци кои го подготвија вештачењето за потребите на Обвинителството.
На претходното рочиште, вештачкиот тим предводен од судскиот вештак и професор на Градежниот факултет при УКИМ, Горан Марковски, повеќе од четири часа одговараше на прашањата на одбраната. Марковски во периодот кога било изработувано вештачењето ја извршувал и функцијата декан на Градежниот факултет.
Прашањата на одбраната се однесуваа на повеќе аспекти поврзани со објектот – неговата пренамена за угостителска дејност, усогласеноста со Деталниот урбанистички план и важечките правилници, изведените градежни работи, како и постапките за добивање лиценци за работа.
Вештаците одговараа и за надлежностите во однос на стручниот надзор, како и за обврските и постапувањето на градежните инспектори.
Во предметот обвинети се сопственикот на објектот Гроздан Милковски и општинските градежни инспектори Огњен Георгиев и Николчо Коцев.
Со предметот раководи судијката Дијана Груевска-Илиевска, додека обвинението го застапува тим од 15 јавни обвинители.
Откако ќе заврши изведувањето на градежното вештачење и ќе бидат сослушани вештите лица, се очекува да биде заокружен делот од доказната постапка предложен од Обвинителството. Потоа, одбраната треба да започне со изведување на своите докази.
Пожарот во дискотеката „Пулс“ избувна на 16 март 2025 година, за време на концертот на групата ДНК. Во трагедијата загинаа 63 лица, а над 200 беа повредени, што го прави настанот една од најтешките трагедии во поновата историја на Северна Македонија.