Вистински хаос се случува со ваучерите за електонски уреди коишто власта им ги вети на студентите од првиот циклус на студии. Аплицирањето започна во понеделникот, кога практично беше и отворен и повикот за аплицирање.
Но, поради големиот наплив на студенти Националниот портал за е-услуги, падна неколку часа по отворањето на повикот. Од Министерството за дигитална трансформација тогаш изјавија дека се покренува дополнителна инфраструктура за да се подели оптоварувањето и да може да се опслужат повеќе апликации.
-Напоменуваме дека не се работи за проблем во софтверската апликација, туку за капацитет за опслужување на големиот обем на апликации, соопштија од ресорното министерство во понеделникот.
Но и два дена по отворањето на повикот, се уште дел од студентите имаат потешкотии да се најават и да го добијат ваучерот што им следува.
Според Законот, пари може да добие секој студент на прв циклус студии што не е постар од 29 години, без разлика дали е запишан вонредно или редовно. Ваучерот може да го искористи до крајот на годината во точно утврдени продавници за електроника, објавени на сајтот заедно со повикот.
Меѓутоа, во овие два дена дел од студенти на мастер студии си ја пробале среќата да аплицираат за ваучер и им успеало. Голем дел од студенти за Пресс24 потврдија дека добиле потврда за ваучер и си подигнале електронски уред. Но, откако веста дека и на многу постдипломци им успеало да добијат ваучер брзо се прошири, властите спроведоа дополнителни мерки.
Попладнево на студентите кои се на мастер студии, a претходно добиле потврда дека имаат добиено ваучер од 250 евра, им пристигна мејл од noreply@info.uslugi.gov.mk дека не се во можност да ги користат ваучерите во продавница.
Ваквиот е-мејл ги разлути студентите. Незадоволството го изразија и на социјалните мрежи. Ова создаде ситуација во која е непознато што ќе се случи со студентите кои веќе земале уред со одобрениот ваучер. Магистрантите реагираат дека се чувствуваат дискриминирано.