Кривичен донесе одлука. 8 години затвор доби Раде Штекли, а неговите соучесници од 3 до 5 години за неговите соучесници.
Тие се обвинети за организирање на криминална група вклучена во неовластено производство и трговија со кокаин и марихуана.
Предметот опфаќаше вкупно 16 лица. Од нив, седуммина претходно склучија спогодба со Обвинителството и добија затворски казни во траење од три до 3,5 години, додека четири лица ја признаа вината, по што за нив постапката беше раздвоена.
Според обвинението, групата оперирала во периодот од јануари 2024 до јануари 2025 година, со јасна структура и дефинирани улоги. Како организатор и координатор, кој ги вршел контактите со странски и домашни посредници за набавка на наркотици и давал насоки за ширење на мрежата, се посочува првообвинетиот Раде Трајковски-Штекли.
Според доказите на Обвинителството, дрогата била складирана во изнајмени станови, а продажбата се вршела по цени од 4.500 до 6.000 денари за грам кокаин и 200 до 300 денари за грам марихуана. Комуникацијата меѓу членовите на групата се одвивала преку апликации за заштитена комуникација, како што е „Снепчет“, а клучните докази биле обезбедени преку анализа на мобилните телефони.
Одбраната на Трајковски, пак, во текот на постапката тврдеше дека ќе докаже оти тој не формирал, ниту организирал криминална група. Адвокатите истакнаа дека не постојат докази дека тој давал какви било инструкции, тврдејќи дека наводите на Обвинителството се базираат на претпоставки. При почетокот на процесот, Трајковски изјави дека не го разбира обвинението, додека останатите обвинети се изјаснија дека не се чувствуваат виновни.