Портпаролот на владејачката ВМРО-ДПМНЕ, Валентин Манасиевски, на денешната прес-конференција упати сериозни критики до опозициската СДСМ во однос на нивната позиција за уставните измени и евроинтегративниот процес, обвинувајќи ги за попустливост кон официјална Софија.
Манасиевски истакна дека опозициската партија ја прифаќа терминологијата која е штетна за националните интереси.
„Почитувани, Мекотелните политики на Филипче и СДС и даваат на Бугарија можност да ги продолжат политиките на негирање на македонскиот идентитет. Филипче и СДС немаат против ние да бидеме „северномакедонци’’, напротив тие ја потврдуваат и шират оваа терминологија, заедно со нивната теза дека уставните измени се последниот чекор за влез во ЕУ.“
Тој направи хронолошки преглед на сите досегашни меѓународни обврски кои државата ги преземаше низ годините, носејќи одлуки за симболите и Уставот.
„Би сакал да ги потсетиме Филипче и СДС, дека промената на државно име беше последниот чекор за влез во ЕУ, па потоа беше промената на знамето, па потпа промената на Уставот, за потоа повторно да го промениме името на државата, и сега да дојдеме до промена повторно во Уставот за додавање на Бугарите, и секако и ова е последниот чекор кој треба да го исполниме за да станеме ЕУ членка.“
Портпаролот на ВМРО-ДПМНЕ се осврна и на претходните најави на поранешното раководство на опозицијата кои, според него, не се реализирале.
„Да не ги заборавиме и датумите за отпочнување на преговорите со ЕУ, кои менторот на Филипче, Зоран Заев неколку пати ги споделуваше во јавноста, за еве 5 години подоцна, поради тие нивни антидржавни политики да сме подалеку од ЕУ, отколку што бевме порано.“
Според Манасиевски, сите клучни компромиси биле направени во мандатите кога со извршната власт раководеле кадри од СДСМ.
„Филипче и СДС треба да извлечат поука од минатото. Тоа е дека Македонија е единствената држава која најмногу страдала и направила најмногу отстапки за да влезе во европското семејство. Сите отстапки кои ги има државата направено се од времето на СДС, кога луѓе поранешни функционери поради лични интереси ја продавале државата. Тоа се истите оние луѓе кои глумат патриоти и говорат за истото, а зад затворени врати потпишуваат бланко листови и го продаваат македонскиот идентитет.“
Прес-конференцијата беше заокружена со став дека државните позиции не смеат да се менуваат заради внатрешно-политички мотиви на опозициските лидери.
„Затоа, Македонија не смее да потклекнува поради криминалното минато на ликови како Зоран Заев и Венко Филипче, кои за да се спасат од правдата и да дојдат на власт, државата би ја однеле во амбис.“