Портпаролот на ВМРО-ДПМНЕ, Валентин Манасиевски, на денешната прес-конференција јавно ги соопшти партиските позиции во однос на евроинтегративниот процес и евентуалните уставни измени.
Од владејачката партија порачаа дека земјата нема да прави нови отстапки додека не добие јасни, цврсти и писмени гаранции од Европската Унија во форма на заклучоци.
Манасиевски упати остри критики до опозицискиот лидер Венко Филипче и поранешниот премиер Зоран Заев, нагласувајќи дека граѓаните веќе платиле висока цена поради нивните претходни меѓународни договори.
„Тогаш беше променето уставното име на Македонија, со длабоки уверувања дека тоа ќе значи сигурен влез во Европската Унија. Но, наместо членство во ЕУ, Македонија доби нови условувања, нови блокади и нови понижувања“, изјави портпаролот.
Според партискиот став, секое понатамошно прифаќање на услови ќе биде блокирано доколку не се заштитат националните интереси и не се обезбеди сигурност за реален напредок кон ЕУ.
Воедно, од ВМРО-ДПМНЕ побараа официјална Софија да почне да ги спроведува одлуките на меѓународните судови кои се однесуваат на македонското малцинство во Бугарија.
„Венко Филипче, наместо да бара уставни измени, нека му пренесе на својот бугарски претседател Румен Радев дека Македонија очекува конкретна испорака од бугарска страна, а таа испорака започнува со почитување и спроведување на пресудите од Стразбур“, рече Манасиевски.
На крајот од своето излагање, тој децидно подвлече дека државата ќе го продолжи својот европски пат, но исклучиво на достоинствен начин и без прифаќање на уцени и диктати.