Социјалдемократската младина на Македонија (СДММ) преку прес-конференција на Стефанија Кузмановска излезе со остри критики кон владејачката ВМРО-ДПМНЕ, обвинувајќи ја дека преку новите законски измени директно удира врз студентскиот стандард и крати од поддршката за младите.
Според Кузмановска, наместо подобрување на условите, власта воведува категоризација на студентските домови во два типа – енергетски ефикасни и нереновирани објекти, што според неа ќе создаде класни поделби.
„Во превод – богатите ќе можат да престојуваат во реновирани домови со подобри услови, а сите останати во старите и нереновирани домови. Власта крати и од поддршката на студентите за сместување и исхрана. За домовите од Тип 1, наместо досегашните 50%, државата ќе покрива само до 40% од трошоците. За домовите од Тип 2, партиципацијата останува до 50%“, изјави Кузмановска.
Од СДММ реагираат дека со овие измени се укинува и ковид-мерката на претходната власт за поддршка до 6.000 денари за приватно сместување или меѓуградски превоз, а се намалува и процентот на стипендии наменети за социјално ранливите категории на студенти од 49% на 40%.
„За ваква ли грижа за младите зборува Мицкоски? Со кое лице им вели на младите „не се иселувајте“, кога истиот тој ја крати поддршката,создава систем во кој образованието станува привилегија, а не право?“, запраша таа.
Од подмладокот на опозицијата додаваат дека ваквите чекори само дополнително ќе го забрзаат иселувањето на младите луѓе од државата кои ќе бараат поправеден систем на странските универзитети.
„Социјалдемократската младина на Македонија бара итно повлекување на ваквото неправедно законско решение. Оваа расипничка и криминална власт ни ја одзема и последната надеж дека тука може достоинствено да се образуваме, да живееме, и да напредуваме“, заклучи Кузмановска.