Опозицискиот СДСМ преку прес-конференција на портпаролката и членка на Извршниот одбор, Богданка Кузеска, упати остри критики до Владата и вицепремиерот Иван Стоилковиќ во однос на надворешнополитичкиот курс на државата.
Од партијата реагираат на неговото последно меѓународно учество во рамки на регионален форум.
„Додека граѓаните чекаат реформи и европска иднина, вицепремиерот Иван Стоилковиќ, најблизок соработник на Мицкоски и втор човек во државата, се обраќа на 7. состанок на локалните лидери на Кина, заедно со српската делегација“, изјави Кузеска.
Таа ја доведе во прашање оправданоста на ваквите дипломатски чекори со оглед на преземените меѓународни обврски на земјата.
„Во земја која полноправна членка на НАТО и кандидат за членство во Европската Унија, вториот човек на владата отворено промовира стратешка соработка со Кина?“, праша портпаролката на СДСМ.
Во своето излагање, Кузеска упати и низа директни обвинувања за политичките релации на вицепремиерот.
„Човекот кој јавно се дружи со „Ноќните волци“ на Путин, кој слави со проруските структури во Република Српска и кој е тесно поврзан со српските безбедноските служби, сега директно заговара продлабочување на врските со Пекинг. Ова не е „дипломатија“. Ова е јасна антиевропска и антизападна политика на криминалната група на власт“, подвлече таа.
Според СДСМ, актуелната владејачка коалиција свесно го кочи процесот на евроинтеграции.
„Мицкоски, Стоилковиќ и ВМРО не сакаат во Европа. Не сакаат реформи. Не сакаат правда. Сакаат изолација, зависност од автократии и продолжување на криминалот без контрола“, обвини Кузеска.
Прес-конференцијата беше заокружена со порака до јавноста и повик за итна промена на владините приоритети.
„Граѓаните веќе јасно гледаат: владата на Мицкоски со едната рака ветува ЕУ, а со другата работи за Кина и руските интереси. Доста е со двојната игра! Реформи сега. Европа сега“, заклучи Кузеска.