До отворањето на избирачките места утрово во 7 часот, регистрирани се 10 пријави за нарушување на изборниот молк. Најмногу пријави има на подрачје на СВР Скопје и СВР Охрид (по три), две на СВР Штип и по една на СВР Тетово и СВР Битола. По преземени мерки, шест од овие случаи не се потврдени, соопшти портпаролот на МВР, Гоце Андреевски.
- „Покрај ова, регистрирани се 19 објави на социјалните мрежи за време на изборниот молк, кои се однесуваат на повик за гласање за одредени кандидати, како и објавени видеа и слики од партиски активности во штабови. Во врска со вчерашното гласање регистриран е настан за фотографирање со гласачките ливчиња во основното училиште „26 Јули“ во општина Шуто Оризари, при што е приведено едно лице и се преземаат мерки за расчистување на настанот“, посочи Андреевски.
Тој нагласи дека гласањето на болни и изнемоштени лица и затвореници поминало без проблеми на сите подрачја.