Градот Скопје во раните утрински часови ја реализираше првата авионска фаза од дезинсекцијата против ларви од комарци. Градоначалникот на Град Скопје Орце Ѓорѓиевски, информираше дека активноста е спроведена согласно Законот за заштита на населението од заразни болести.
Оваа мерка е од клучна важност за превенција од ширење на заразни болести и обезбедување квалитетна животна средина пред почетокот на летната сезона.
„Навременото третирање на ларвите е најважниот чекор во спречување на масовна појава на комарци во летниот период“, истакна Ѓорѓиевски.
Надлежните најавуваат дека во претстојниот период ќе следуваат уште четири дополнителни фази, кои ќе вклучат и авионско прскање и прскање од земја на целата територија на градот.