Членот на Извршниот одбор на СДСМ, Јон Фрчкоски, на денешната прес-конференција изнесе обвинувања за корупција и нерегуларности во постапката за набавка на нови автобуси за потребите на главниот град.
Фрчкоски покажа документ за кој тврди дека е официјална претставка до Министерството за транспорт која директно ја потврдува нивната теза за фаворизирање на одредена компанија блиска до унгарските власти.
„Додека граѓаните со часови чекаат по станиците и се возат во распаднати автобуси, фокусот на власта е исклучиво со местење тендери и милионски зделки. Затоа пропадна тендерот за набавка на 150 автобуси кој го најавуваше Орце и затоа скопјани уште ќе чекаат, ќе дремат по автобуски станици, ќе доцнат, ќе се варат или ќе мрзнат“, изјави Фрчкоски.
Според опозицијата, иако основниот критериум во јавниот повик бил избор на најниска понудена цена, надлежните се одлучиле за значително поскап понудувач.
„Разликата е шокантна: постоела понуда која е поевтина за 12 милиони евра! Или по автобус, точно 78,563 илјади евра. ВМРО-ОКГ планирала да го оштети буџетот и граѓаните за речиси 12 милиони евра! Толку им е тарифата“, потенцираше претставникот на СДСМ.
Тој додаде дека за поевтината понуда надлежните структури биле писмено предупредени уште во текот на ноември 2024 и дополнително во декември 2025 година, но свесно продолжувале со процесот.
Поради наводните прекршувања, Фрчкоски најави дека случајот веќе го презема американски правен тим кој за настанот ќе информира високи меѓународни институции.
„Поради скандалозното однесување, случајот го презема американскиот адвокатски тим „The Ticktin Law Group“, кој најавува дека за овој меѓународен скандал ќе ги извести Белата куќа, Стејт департментот и Американската амбасада во Скопје“, соопшти тој.
На крајот, од СДСМ побараа итна реакција од домашните правосудни органи за отворање истрага и утврдување на одговорност за пропаднатиот тендер.