Заменик-министерот за социјална политика, демографија и млади, Ѓоко Велковски, денеска во Собранието ги демантираше тврдењата на пратеничката Јованка Тренчевска (СДСМ) дека Фондот за ПИОМ е пред колапс и дека нема пари за декемвриската пензија.
„Немој да сеете страв дека Пензискиот фонд бил пред колапс, дека немало да има пензии на 1 декември. Сето тоа се лаги и ќе биде демантирано за само неколку дена од денеска. Ќе бидат исплатени тие пензии, и во 2026 и во 2027 и понатаму и ќе има покачувања согласно законските прописи. Граѓаните нека бидат мирни“, потенцираше Велковски.
Велковски ја критикуваше СДСМ, нагласувајќи дека:
- Пензиите што изнесувале 14.000 денари сега се 20.000 денари, а оние од 20.000 сега се 26.000 денари, обезбедувајќи „достоинствен живот“.
- Пензиите се усогласуваат по компонентите инфлација и трошоци на живот во Македонија.
Заменик-министерот, исто така, нагласи дека приоритет се граѓаните што се во земјава и придонесуваат за општеството.