Еден од компјутерските томографи на Универзитетскиот институт за радиологија во Скопје од денеска повторно е во функција и е достапен за дијагностички прегледи, информираат од Министерството за здравство.
Оттаму посочуваат дека веќе е започнато организирано контактирање на пациентите чии прегледи беа одложени поради проблемите со апаратите, со цел да им бидат доделени нови термини во најкус можен рок.
За да се забрза процесот и да се намали чекањето, Институтот ќе работи во две смени, а дополнителни прегледи ќе се вршат и во текот на претстојниот викенд. Термините ќе се организираат според расположливите капацитети и медицинските приоритети.
Сепак, вториот компјутерски томограф, кој се наоѓа во хируршкиот комплекс и првенствено се користи за дијагностика на итни пациенти, сè уште е во сервис. Од Министерството очекуваат поправката да биде завршена наскоро.
Во меѓувреме, итните пациенти се упатуваат на прегледи во Градската општа болница „8 Септември“ и Универзитетската клиника за хируршки болести „Свети Наум Охридски“, согласно координацијата меѓу здравствените установи.
Од Министерството за здравство апелираат да не се шират непроверени информации за состојбата, нагласувајќи дека се преземаат мерки за да се обезбеди континуитет во пружањето на неопходните здравствени услуги.