Почнува третата фаза од проектот за е-фактура, во рамките на која Управата за јавни приходи (УЈП) овозможува тестирање на системот преку нова веб-апликација, со цел компаниите да добијат практична тест-околина за електронска размена на фактури, информираат од институцијата.
Во првата фаза се тестираше интеграцијата на ЕРП-системите на компаниите со системот за е-фактура, додека во втората фаза беа воведени API-сервиси за преземање, прифаќање, одбивање и сторнирање на е-фактури, како и можност за тестирање на повеќе даночни индикатори. Во овој период беше направено и приспособување на структурата на API-повиците и JSON-форматот согласно новите спецификации објавени од УЈП.
Во третата фаза се преминува на веб-апликација преку која секоја компанија – без разлика на големината – може да тестира креирање, испраќање, прифаќање, одбивање и сторнирање на документи. Апликацијата овозможува тестирање на општата фактура со 12 даночни индикатори, со што се обезбедува поедноставен пристап до системот за сите деловни субјекти.
Од УЈП посочуваат дека со ова се овозможува постепена подготовка за целосна примена на системот за е-фактура во пракса.
Во рамките на тестирањето се вклучени околу 200 избрани компании, кои во соработка со даночни агенти ќе спроведуваат структурирани тест-сценарија и ќе доставуваат повратни информации до Управата.
УЈП информира дека континуирано се организираат едукативни средби со стопанските комори и деловната заедница, а досега се одржани околу 30 информативни сесии за презентирање на системот.
Во наредниот период се најавуваат дополнителни средби, вебинари и детални упатства со цел полесно користење и тестирање на системот од страна на компаниите.
УЈП ги повикува сите компании, вклучително и оние без назначен даночен агент, активно да учествуваат во тестирањето и да доставуваат предлози и забелешки за понатамошно унапредување на системот.