Василевска: Во државата има корумпирани судство и Обвинителство

Почитувана неприсутна Влада, жална Македонија, распарчена, понижена, исмеана од лакрдија, која се нарекува некаква си демократија, која полна уста празни зборови вергла ЕУ веднаш и сега, ЕУ за вас, за нас, за сите вас, но не и за нас, само за тие избраните, лимитираните. Македонскиот парламент стана сè, само не она што треба да биде и бидејќи вие не нè разбирате и не ги разбирате добронамерните пораки и совети. Разберете, улогата што ја имате вие, не сме ничие стадо, не сте ничие трло, вие претставувате волја на граѓаните, рече Иванка Василевска од ВМРО-ДПМНЕ, пратеничка во Собранието, на денешната собраниска седница обраќајќи се пред пратениците.

Таа укажа на целата ситуација во државата, односно на високата инфлација, на корумпираните судство и Обвинителство и потенцира дека поради ваквата ситуација во државата, голем број млади си заминуваат.

„Граѓаните се вознемирени бидејќи растот на инфлацијата ги крена кредитите, набргу луѓето ќе остануваат без своите домови. Можевме да се справиме со сè. Погледнете си го судството, Обвинителството, погледнете ја целата јавна и државна администрација, заробено општество, класичен пример на изгубена една генерација и затоа нашите деца ќе си заминуваат, ќе нè гледаат со презир, милион пати сум го кажала тоа изминативе години“, истакна пратеничката.

Василевска во текот на своето обраќање запраша зошто министерот за здравство е разрешен и праша што направила власта во овие 6 години?

„Зошто господинот министер за здравство не си дал оставка, туку го разрешуваме, зошто? Ќе го разрешиме зашто треба виновници, треба во прекројувањата во Тирана што ги направија и што ни ги сервираа тука, сега повторно да се создаваат тензии, зошто? За да крадат вашите елити уште повеќе. Што покажавте во овие 6 години, дека се справивте со корупцијата и со криминалот. Да беше така, јас прва ќе ви аплаудирав, додаде Василевска.