Четириесет и шестгодишен скопјанец итно е пренесен во болница откако вчера попладне бил пронајден со убодна рана во неговиот дом на подрачјето на општина Аеродром.
Случајот во СВР Скопје бил пријавен од страна на Службата за итна медицинска помош вчера околу 14:00 часот, по што полициски екипи веднаш излегле на терен.
Поради сериозноста на повредата предизвикана од нож, повредениот Д.Б. (46) од Скопје експресно бил транспортиран во Комплексот клиники „Мајка Тереза“ за укажување лекарска помош.
Полициските службеници извршиле разговор со повредениот, при што според првичните сознанија и неговата лична изјава, тој сам се повредил при пад во кујната додека работел.
За инцидентот веднаш бил известен и дежурниот јавен обвинител, а полицијата во моментов презема дополнителни мерки за целосно расчистување на случајот.