Православните христијани утре го прославуваат големиот празник Вознесение Христово, во народот познат како Спасовден. Овој голем Христијански празник секогаш се паѓа во четврток, точно четириесет дена по Воскресението Христово – Велигден.
Според црковното предание, во текот на овие 40 дена по своето воскресение, Исус им се јавувал на своите ученици и ги подготвувал за нивната идна активност, зборувајќи им за царството Божјо.
Интересно е што во овој меѓупериод, сè до самиот празник, верниците сè уште ја задржуваат традицијата на празнично поздравување.
„Во овој период луѓето сè уште се поздравуваат со христијанскиот поздрав „Христос воскресе“ (Христос воскресна) и си отпоздравуваат со „Воистину воскресе“ (Навистина воскресна). Празникот Вознесение Христово се празнува во спомен на вознесувањето на Исус Христос на небото.“
Светото писмо пренесува конкретни детали за моментот кога Спасителот се вознел пред очите на своите следбеници, оставајќи им клучни заветувања за во иднина.
„И откако им заповеда да не го напуштаат Ерусалим, туку да го чекаат слегувањето на Светиот Дух, тој ги изведе своите ученици во Витанија, ги благослови и се вознесе на небото.“
Текстовите понатаму опишуваат дека во тие моменти на учениците им се јавиле и небесни пратеници со важна објава.
„Додека учениците гледаа во облакот што го сокри Господа пред нивните очи, ангелите им објавија дека истиот Исус кој од нив се вознесе на небото пак ќе дојде на ист начин како што го видоа да се вознесува. Овој празник се нарекува Спасовден затоа што во денот на Христовото вознесение се доврши делото на спасението“.