Во организација на Стопанската комора на Македонија денеска во Скопје ќе се одржи конференцијата „Од диплома до компетенции: новата улога на универзитетите преку поврзување на академијата и економијата“.
Целта на настанот е да се отвори национален и регионален дијалог за трансформација на високото образование во насока на поддршка на економскиот развој, зголемување на конкурентноста, поттикнување на иновациите, задржување на талентирани кадри и создавање човечки капитал усогласен со потребите на современиот пазар на труд.
Воведни обраќања ќе имаат претседателот на Стопанската комора на Македонија, Бранко Азески, како и претседателот на Советот за унапредување на високото образование и стратешки истражувања при Комората, проф. д-р Марјан Ѓуровски.
Во рамки на конференцијата ќе се одржат две панел-дискусии на кои ќе учествуваат претставници од бизнис-секторот и академската заедница, меѓу кои Ристо Јаневски од ОКТА АД, Виктор Мизо од КОСТАЛ Македонија и Андреа Серафимовски од ГРАНИТ АД.
Се очекува да бидат презентирани заклучоци и препораки за унапредување на соработката меѓу универзитетите, бизнис-секторот и институциите, со посебен акцент на развој на проекти и истражувања поврзани со потребите на пазарот на труд.