Украинската армија во следната деценија ќе има потреба од неколку стотици милијарди долари странска помош за нејзино одржување, изјавија денеска во Давос двајца украински министри, пренесе ДПА.
Според украинскиот вицепремиер Тарас Качка, одговорен за интеграцијата на земјата во Европската унија и НАТО, трошоците би можеле значително да пораснат доколку не се промени однесувањето на Русија.
„Доколку агресивното однесување на Русија кон Европа и светот не се промени, тогаш трошоците би достигнале 700 милијарди долари“, изјави Качка за време на панел-дискусијата на Светскиот економски форум во Давос.
Министерот за економија Олексиј Соболев појасни дека станува збор за дополнителни трошоци за одбрана кои не се вклучени во државниот буџет и за кои ќе биде потребно финансирање од други извори.
Тој наведе дека буџетските трошоци за одбрана на Украина во следните 10 години се проценуваат на речиси 500 милијарди долари.
Украина речиси четири години се брани од руската инвазија со поддршка од странски партнери.
Според податоците на Институтот за светска економија од Кил, на Украина досега ѝ е обезбедена воена помош во вредност од повеќе од 234 милијарди долари, пренесе ДПА.