Факултетите на Универзитетот „Св. Кирил и Методиј“ – Скопје денеска ќе ги објават конечните ранг-листи за примени студенти во првата година за академската 2026/2027 година, по одржаниот прв уписен рок на 18 и 19 август.
Ofицијалното запишување на примените кандидати ќе се спроведе на 3 и 4 септември.
Со конкурсот на најголемиот и најстар универзитет во државата, на 23-те факултети беа понудени вкупно 8.851 слободно место за идните бруцоши. Новата академија ќе започне на 1 октомври.
Од вкупниот број слободни места, 4.395 се наменети за редовни студенти во државна квота финансирани од буџетот, 3.621 за редовни студенти со кофинансирање на студиите и 835 за вонредни студенти.
Како и изминатите години, најголем капацитет за запишување кандидати на повеќе студиски програми понудија:
- Медицински факултет – 950 места
- Филолошки факултет – 805 места
- ФИНКИ – 800 места
- Економски факултет – 655 места
- Филозофски факултет – 635 места
- Природно-математички факултет (ПМФ) – 626 места
- ФЕИТ и Машински факултет – по 600 места
- Правен факултет – 555 места
За кандидатите кои нема да се запишат во првиот рок или сакаат да се пријават дополнително, вториот уписен рок ќе се одржи на 10 и 11 септември, додека третиот рок е предвиден за 23 септември на факултетите каде што ќе останат слободни места.
Пред поднесувањето документи во службените простории, секој кандидат треба да изврши електронска регистрација на www.upisi.ukim.mk и да ја пополни пријавата во iKnow-системот. Добиениот автоматски број од системот задолжително се внесува во хартиената пријава што се поднесува до службата за студентски прашања на избраниот факултет.